Heilbrigðisritarabraut

Um nám á heilbrigðisritarabraut

Nám heilbrigðisritara er 120 einingar með námslok á 2. hæfniþrepi. Brautin samanstendur af almennum greinum, heilbrigðisgreinum, sérgreinum brautar og vinnustaðanámi. Til að geta stundað nám á brautinni þarf að hafa lokið grunnskóla með tilskildum lágmarksárangri. Nemendur þurfa að hafa náð 18 ára aldri þegar þeir hefja vinnustaðanám heilbrigðisritara.

Inntökuskilyrði

Skilyrði til innritunar í nám á heilbrigðisritarabraut er grunnskólapróf. Til að hefja nám á 2. hæfniþrepi í kjarnagreinum (íslensku, stærðfræði, ensku og dönsku), þarf nemandi að hafa náð hæfnieinkunn B við lok grunnskóla eða lokið fyrsta þreps áfanga í þessum greinum.

Til þess að ná góðum árangri í starfi þarf viðkomandi að hafa gott vald á íslensku og eiga auðvelt með mannleg samskipti, búa yfir umtalsverðri tölvukunnáttu, sérstaklega í ritvinnslu og sérhæfðum forritum um sjúklinga- og starfsmannabókhald hvers konar, auk þekkingar á hagnýtri notkun upplýsingatækninnar. Jafnframt er nauðsynlegt að þekkja til algengustu hugtaka sem lækningar og hjúkrun byggjast á og hafa innsýn í hugmyndafræði og skipulag heilbrigðisþjónustunnar í landinu. Þá þarf að hafa innsýn í siðfræðileg málefni er varða gagnaöflun, meðferð persónuupplýsinga og faglegan metnað.

Nemendur skulu hafa náð 18 ára aldri þegar þeir hefja vinnustaðanám.

Vinnustaðanám

Vinnustaðanám á heilbrigðisstofnun eða fyrirtæki í heilbrigðisþjónustu tekur við að loknu bóknámi í skóla. Það skiptist í 6 vikna skipulagt vinnustaðanám á heilsugæslu undir leiðsögn starfandi heilbrigðisritara og 6 vikna vinnustaðanám á sjúkrahúsi undir leiðsögn starfandi heilbrigðisritara.

Vinnustaðanámið fer fram á vinnustað sem viðkomandi skóli viðurkennir. Kennslustjóri brautar sækir um nemapláss í samráði við nemanda og skólinn gerir námssamning við vinnustaðinn fyrir hönd nemandans. Í samningnum er tilgreind lengd vinnutíma, gildistími samnings og skyldur nemanda, skóla og stofnunar. Í samningi skal einnig koma fram hvernig fara skuli með ágreining sem upp kann að koma. Hverjum nemanda skal fenginn leiðbeinandi sem skal vera reyndur heilbrigðisritari á viðkomandi vinnustað.

Ferilbók sem fylgir hverjum nemanda í vinnustaðanámi er á ábyrgð nemanda og leiðbeinanda og er hún hluti af námsmati.

Markmið að loknu námi:

• búa yfir alhliða þekkingu og færni til að gegna þeim störfum sem tilheyra starfssviði heilbrigðisritara samkvæmt starfslýsingu, þekkja réttindi og skyldur heilbrigðisritara
• hafa öðlast færni til að sinna skjólstæðingum í samræmi við hugmyndafræði og stefnu vinnustaðar og unnið í samstarfi við aðra af fagmennsku
• vera meðvitaður um vinnuvernd og öryggi á vinnustað og mikilvægi hreinlætis, smitvarna, trúnaðar, þagmælsku og góðra samskipta
• kunna að skipuleggja, framkvæma og meta eigin vinnu í samræmi við viðurkennda gæðastaðla og markmið stofnunar og fyrirtækis, geta raðað verkefnum í forgangsröð
• geta aflað fræðilegra upplýsinga eftir fjölbreyttum leiðum og búa yfir nægilegri þekkingu til að meta upplýsingagildi og áreiðanleika þeirra
• hafa þekkingu á skipulagi íslenska heilbrigðiskerfisins og hlutverki helstu þjónustuþátta þess og geta nýtt sér þá þekkingu í starfi
• búa yfir áhuga og frumkvæði til að viðhalda þekkingu sinni og tileinka sér nýjungar er varða starfið.

Spurt og svarað 

Hér má finna algengar spurningar og svör um heilbrigðisritaranám:

Spurt og svarað

Prentvæn útgáfa

Endurskoðuð námsbraut heilbrigðisritara tók gildi í janúar 2023, nemendur sem langt eru komnir í námi samkvæmt fyrri útgáfu er heimilt að ljúka samkvæmt henni. Allir nýir nemendur hefja nám samkvæmt endurskoðaðri námsbraut. Nánari upplýsingar hjá kennslustjóra brautar.

Heilbrigðisritarabraut (pdf)

Heilbrigðisritarabraut (excel)