Fjölbrautaskólinn við Ármúla

Dagur íslenskrar náttúru var haldinn hátíðlega við skólann þann 16. september. Fjörug dagskrá var við skólann að tilefninu. Umhverfisráð nemenda stóð fyrir ratleik fyrir nemendur þar sem þau fundu Grænfánann, rúlluðu sér niður brekkuna á skólalóðinni og skoðuðu plöntur í kringum skólann. Sjálfbærninefnd skólans (starfsfólk og stjórnendur) stóð vaktina við flokkunartunnur og aðstoðaði nemendur í vafa við flokkun. Allar deildir skólans gróðursettu íslenskar plöntur á svæði á skólalóðinni sem síðar meir verður útikennslustofa. Nú á hver deild skólans sína plöntu og munu þær fylgjast vel með henni. Plönturnar sem urðu fyrir valinu í ár eru Bæjarstaðabirki og Kasmír-reynir. Íslensk lög með umhverfisboðskap voru spiluð bæði í matsal skólans og á kaffistofu starfsfólks. Þátttaka í deginum var til fyrirmyndar og gaman að sjá hvað nemendur tóku virkan þátt í ratleiknum. Dagur íslenskrar náttúru hefur verið haldinn hátíðlegur síðan árið 2011. Tilgangur dagsins er að beina sjónum okkar allra að hinni einstöku náttúru landsins, þeim auðæfum sem í henni felast og mikilvægi þess að vernda hana og varðveita. Dagurinn er fæðingardagur Ómars Ragnarssonar en hann hefur lengi verið ötull talsmaður náttúruverndar.

Núna í vikunni vorum við með góða gesti í heimsókn frá Ferrentino á Ítalíu, þær Sara Colatosti og Daniela Meaglia. Þær voru í undirbúningsheimsókn að kanna hvort skólarnir okkar geti unnið saman að verkefni. Við stefnum á að hefja samstarfið næsta haust en þá koma fimm nemendur frá þeim í heimsókn til okkar. Þær Edda Lára og Jeannette tóku vel á móti þeim, funduðu, sýndu þeim skólann og svo kíktu þær í kennslustundir. Við hlökkum til frekari samstarfs með þeim Sara og Daniela.

Nýnemaferð skólans var farin í Lækjarbotna í gær, þar sem sólin lék við mannskapinn. Nemendur tóku þátt í hörkuspennandi keppni þar sem þeir leystu fjölbreyttar þrautir fyrir stig. Stigin voru gjaldmiðill fyrir teningakast í hinu feikivinsæla snákaspili. Þeir þrír hópar sem náðu bestum árangri í snákaspilinu voru leystir úr ferðinni með vinningum frá Nemendafélagi skólans. Dæmi um þrautir í ferðinni má nefna stígvélakast, ruslatýnslu, reipitog, bátagerð, blindraþraut, limbó, pokahlaup og líflínukast. Nemendur og kennarar skemmtu sér konunglega. Viðburðastýrurnar Kolbrún Ósk Pétursdóttir og Sædís Ósk Helgadóttir sáu um þrautaleikinn sem vakti mikla lukku meðal nemenda. Eftir æsispennandi keppni grilluðu skólameistari og aðstoðarskólameistari pylsur fyrir öll viðstödd. Nemendafélagið gaf nemendum gos og prins póló. Þá kusu nýnemar skólans sér nýnemafulltrúa, sem verða tengiliðir þeirra við nemendafélagið. Kosningu hlutu þau Lilja Hönnudóttir og Kristján Bergur S. Stefánsson. Við óskum þeim innilega til hamingju með kjörið.

Þrír stúdentar úr FÁ hlutu nú á dögunum styrk úr afreks- og hvatningarsjóði stúdenta Háskóla Íslands. Styrkir eru veittir nýnemum við Háskóla Íslands sem náð hafa framúrskarandi árangri í námi til stúdentsprófs og jafnframt látið til sín taka á öðrum sviðum, svo sem í félagsstörfum í framhaldsskóla eða listum og/eða íþróttum. Styrkþegar úr FÁ voru þær Brynja Guðmundsdóttir, Snædís Hekla Svansdóttir og Uyen Thu Vu Tran. Brynja Guðmundsdóttir brautskráðist frá Fjölbrautaskólanum í Ármúla í vor með afar góðum árangri og hlaut m.a. viðurkenningu fyrir aðstoðarkennslu og framúrskarandi árangur í efnafræði. Hún hefur mikinn áhuga á rannsóknum tengdum líffræði, frumum og sameindum og hefur því innritað sig í lífefna- og sameindalíffræði. Snædís Hekla Svansdóttir brautskráðist frá Fjölbrautaskólanum við Ármúla í desember 2023 og var dúx skólans en hún lauk stúdentsprófi á tveimur og hálfu ári. Við útskrift hlaut hún viðurkenningar fyrir góðan árangur í ítölsku, íslensku og félagsgreinum. Listsköpun hefur verið stór hluti af lífi Snædísar sem hefur unnið fjölbreytt listaverk, bæði málverk og skúlptúrverk, og sýnt þau. Þá var Snædís einnig virk innan stjórnar nemendafélags FÁ. Snædís hefur innritað sig í lögfræði. Uyen Thu Vu Tran brautskráðist frá Fjölbrautaskólanum í Ármúla í vor og hlaut viðurkenningu fyrir mjög góðan árangur í viðskipta- og hagfræðigreinum. Uyen flutti hingað til lands í miðjum COVID-19-faraldri og þurfti því að tileinka sér íslenska tungu samhliða framhaldsskólanámi. Uyen stefnir á að vinna innan fjármálageirans í framtíðinni og hefur því innritað sig í viðskiptafræði. Við sendum þeim Brynju, Snædísi og Uyen okkar innilegustu heillaóskir. Nánari upplýsingar um verðlaunin og verlaunahafana eru á vef Háskóla Íslands.