Sá á kvölina sem á völina, er stundum sagt en það er varla mikil pína að velja nám fyrir næstu önn. Það er bara að fara inn á INNU og ganga frá valinu. Valið er opið fram til 2. nóvember og því ekki seinna vænna að ganga frá því ef það hefur ekki þegar verið gert. Umsjónarkennarar eru til aðstoðar ef einhverjar spurningar í sambandi við valið vakna.

Fyrsti vetrardagur er í dag. Nú fer að frysta og snjóa og myrkrið grúfir sig yfir landið. En örvæntum ekki. Sumardagurinn fyrsti kemur eftir sex mánuði. Nú eru ekki nema rúmlega sex kennsluvikur eftir af þessari önn. Tíminn flýr hratt. Hvað sem kulda og myrkri líður eru jólin samt skemmra undan en margur heldur. Ljósið í myrkrinu og við höldum okkar striki, stöndum okkar plikt og lifum og lærum sem aldrei fyrr. Er óhætt að segja: Gleðilegan vetur?

Freyja Eilíf, myndlistarmaður,kemur í FÁ ídag, þriðjudag, og heldur erindi í fyrirlestrarsalnum kl. 11:40. Freyja Eilíf er dugandi listamaður sem rekur eigið gallerí -EKkisens - og er þar að auki kennari. Öllum áhugasömum nemendum, kennurum og öðrum starfsmönnum er boðið á kynninguna en markmið “Dags Myndlistar” er veita ungu fólki innsýn í það viðamikla starf sem felst í því að vera myndlistarmaður og bæta þannig grunnþekkingu á faginu. Hér má sjá heimasíðu Freyju Eilífar.

Í dag, hófst vetrarfrí og þögnin leggst yfir kennslustofur og ganga skólans og engin leiftur frá farsímaskjám munu lýsa upp skólahúsið næstu daga. Kyrrðin í skólanum mun vara fram á þriðjudag 23.október en þá hefst skóli á ný og vonandi koma allir aftur hressir í bragði. Það má einnig minna á það að á þriðjudaginn verður Dagur myndlistar í hávegum hafður og í tilefni hans boðið upp á fyrirlestur á vegum myndlistarmannsins Freyju Eilífar í salnum frá klukkan 11:40.

Kennslumat annarinnar fer fram í INNU eins og áður og nemendur geta nálgast könnunina undir liðnum KANNANIR ofarlega á síðunni. Kennslumatið er opið til og með 18. október og því fer hver að verða seinastur að skila inn áliti sínu á kennslustörfum í FÁ. Það er mikilvægt að sem flestir taki þátt svo að hægt sé að byggja á könnuninni. Semsagt, klára dæmið fyrir haustfrí.

Það er vel þess virði að minnast þess að nú er liðin öld frá því að spænska veikin gerði usla á Íslandi og olli miklu manntjóni. Við skulum vona að sú arma pest láti ekki aftur á sér kræla. En inflúensa herjar samt árvisst hér á landi og margir veikjast af hennar völdum og suma getur hún lagt af velli ef þeir eru veikir fyrir. Sem betur fer er fólk ekki eins varnarlaust og fyrir einni öld og hér í FÁ var starfsfólki boðið að láta sprauta sig gegn þeirri vá sem inflúensan er. Lifi læknavísindin!

Menn ganga á fjöll af því að þau eru þarna. Og hvað jafnast á við það að sitja á háum tindi og horfa yfir landið?
Núna á laugardaginn, 6. okt. ætla nemendur í útivistaráfanganum að vísu ekki að klífa Hraundranga heldur Helgafell við Kaldársel. Það verður að duga í bili. Lagt verður upp frá FÁ á klukkan 9:00 á laugardaginn og kostar eitt þúsund krónur fyrir þá sem skrá sig fyrir hádegi á föstudag.

Á morgun, 2. október kl.13 verður sérstök skólasýning fyrir nemendur FÁ á kvikmyndinni „Lof mér að falla“ í tilefni væntanlegs forvarnardags framhaldsskólanna. Einn af aðstandendum kvikmyndarinnar mætir og ræðir við nemendur um inntak og boðskap hennar en forvarnargildi myndarinnar mun vera ótvírætt. Nemendur sem vilja sjá myndina fá leyfi eftir hádegi 2. október en verða að skrá sig á skrifstofunni. Sýningin verður á tilboðsverðinu 1500 kr. (greitt í miðasölu Smárabíós við mætingu). Allir í bíó!