Leikar fóru þannig að dómnefndin valdi Elísabetu Marteinsdóttur í fyrsta sæti, Alexendöndru Ýri í annað sæti og Birtu Birgisdóttur í þriðja sæti en Birta á þann heiður að vera fyrrverandi vinningshafi í keppninni. Það þarf ekki að hafa fleiri orð um þessa bærilegu skemmtun og myndir og vídeóbúta má finna á Facebook-síðu skólans.

Spennan fer sívaxandi fyrir kvöldið. Hver verður tónlistardrottning eða -kóngur FÁ? Það kemur í ljós í kvöld.
Húsið verður opnað klukkan sjö en keppnin hefst klukkan hálf átta. Hver eða hvað vinnur? Verður það þungarokk? Hipphopp og rapp eða hljómþýður rytmogblús? Kannski mildur ljóðasöngur eða grátandi blús? Það fáum við að vita í kvöld og líka hver fer heim með verðlaunin fyrir mestu fórnina á altari heilagrar Sesselju.

Núna á fimmtudaginn fer fram söngkeppni nemendafélagsins hér í FÁ. Þátttaka er mjög góð; 19 flytjendur eru skráðir til leiks og má búast við hörkukeppni enda til mikils að vinna. Enginn með viti skyldi láta þennan viðburð fram hjá sér fara. Húsið verður opnað kl. 19 en sjálft dúndurfjörið hefst kl. 19:30

Dagana 28.-30. mars verða Umhverfisdagar í FÁ. Það eru nemendur undir stjórn Bryndísar Valsdóttur umhverfisfulltrúa sem sjá um framkvæmdina og ekki að efa að þátttaka verði góð enda umhverfið mál okkar allra. Verum öll þátttakendur og mótum okkur stefnu er varðar sjálfbærni og umhverfi, björgum jörðinni frá sjálfum okkur! Munum að við erum ekki seinasta kynslóðin sem gengur um á jörðinni.

(sjá dagskrá)

Í gær, 22. mars, fóru nemendur í Lögfræði á viðskipta- og hagfræðibraut FÁ í heimsókn í Hæstarétt.Nemendur höfðu bæði gagn og gaman að því að kynna sér starfsemi réttarins og gátu nýtt sér þekkingu sína úr áfanganum til þess að spyrja gagnlegra spurninga og afla sér betri þekkingar á  hvernig dómurinn starfar. Þá gafst nemendum færi á að skoða þessa tignarlegu byggingu í krók og kima og aldrei að vita nema einhver þeirra eigi eftir að setjast í dómarasæti þegar fram líða stundir?

Foreldraráð FÁ ásamt skólayfirvöldum býður til fræðslu-fyrirlestrar miðvikudaginn 22. mars kl. 19:30-20:30 í fyrirlestrar-sal skólans. Fyrirlesarinn er Matti Ósvald Stefánsson M.Th.-NLP Pr. heilsuráðgjafi og alþjóðlega vottaður ACC markþjálfi. Hann mun í erindi sínu fjalla um góð og uppbyggileg samskipti, hvað er það dýrmætasta sem gefa má unglingnum og innri kröfur ungs fólks og hvað er til ráða. Foreldrar nemenda eru hvattir til að fjölmenna og eiga samræðu um uppeldi og styrkingu unglinga.

Opið hús verður í dag í Fjölbrautaskólanum við Ármúla frá kl. 16:30 til 18:30. Kynning á námsbrautum skólans, bóknámi og þriggja ára stúdentsbrautum, starfsnámi í heilbrigðisgreinum, fjarnámi, aðstöðu og félagslífi nemenda. Áhugasamir eru hvattir til að heimsækja skólann, 10. bekkingar og foreldrar þeirra eru sérstaklega boðnir velkomnir

Það var sannkallaður leiksigur hjá Leikfélagi FÁ í kvöld. Söngleikurinn Ótemjan er fjörugt og skemmtilegt sjónarspil, farsi sem byggir á kvikmyndinni 10 Things I Hate about You. Það má með sanni segja að leikhópurinn hafi farið fram úr öllum vonum og það eina slæma sem hægt er að segja um sýninguna í kvöld er að það verður erfitt að toppa hana ....(meira).

Á opnu húsi skólans verða námsbrautir, félagslíf og aðstaða kynnt væntanlegum umsækjendum um skólavist.
Eru 10. bekkingar og foreldrar þeirra sérstaklega hvattir til að heimsækja skólann og kynnast starfseminni og því besta sem skólinn hefur upp á að bjóða. Sönghópur skólans mun flytja tónlist úr söngleiknum Ótemjunni og einnig munu nemendur úr Söngskóla Sigurðar Demetz flytja tónlist fyrir gesti.

Í kvöld verður gaman. Leiklistarhópur FÁ frumsýnir leikverkið Ótemjuna klukkan átta í kvöld. Spennan er mögnuð. Verður leikverkið eins skemmtilegt og undanfarin ár eða sýnu betra? Það kemur í ljós í kvöld og nú ættu allir að mæta til þess að sjá hvernig til tekst en hópurinn hefur staðið í ströngu að undanförnu og við skulum vona að hæfileikafólkið okkar uppskeri eins og það sáði (meira)...