Laugardaginn 30. mars er ætlunin að nokkrir fræknir nemendur gangi á Móskarðshnjúka. Lagt verður af stað frá FÁ stundvíslega kl 9:00 og stefnt á að vera komin í bæinn um kl 14:00.
Þetta er um 8 km löng ganga en þar sem veðurspáin er góð, gæti gangan hæglega orðið lengri.

Skráið ykkur í tíma, seinast var uppselt í rútuna.

Fjallganga eftir Tómas Guðmundsson:

I
Urð og grjót.
Upp í mót.
Ekkert nema urð og grjót.
Klífa skriður...

Nú styttist í að gamansöngleikurinn Ólympus - Leikur að fólki, verði frumsýndur en frumsýningin verður núna á föstudaginn 29. mars í sal Fjölbrautaskólans við Ármúla. Verkið gerist í Grikklandi árið 390 f.kr. Þegar Seifur, æðsti guðinn á Ólympus, ákveður að skella sér í frí með eiginkonu sinni Heru, efnir hann til keppni milli guðanna til að ákveða hver skal taka við völdum í fráveru hans. Systkinin Artemis, Aþena, Díónýsus og Afródíta þurfa að fara niður á jörðu og keppast um hylli ungs pilts til að hreppa hásætið á Ólympus. Þau beita ýmsum klækjum til að snúa örlögunum sér í vil en það er síður en svo auðvelt að sigra þegar þau mega ekki gera það sem þau gera best - svindla og skemma hvert fyrir öðru...sjá meir.

FÁ hefur alltaf verið opinn öllum sem þangað vilja sækja en fimmtudaginn 21. mars verður OPIÐ HÚS fyrir alla, konur og kalla, frá 16:30 til 18:00 þar sem allar deildir skólans kynna starfsemi sína. Það er meira í boði en margan grunar, á OPNU HÚSI má kynna sér aðstöðuna í glæsilegu skólahúsinu, læra um kosti fjarnámsins og fá nasasjón af fjörlegu félagslífi nemenda. Vonandi sjá sem flestir sér fært að mæta og kynnast hinu góða starfi sem unnið er í FÁr

FÁ hefur lengi verið í fararbroddi í umhverfismálum og fengið grænfánann í ófá skipti. Nú verða haldnir umhverfisdagar í skólanum þótt auðvitað séu allir dagar umhverfisdagar. Umhverfisdagarnir byrja kl. 10 þann 20. mars þegar umhverfismarkaður verður opnaður en að öðru leyti lítur dagskrá dagana svona út: (smella hér).

Á hádegi í dag var opnað fyrir kennslumat vorannar og það verður opið til 28. mars.
Að þessu sinni eru metnir 72 áfangar og má sjá hér hvaða áfangar fara í mat að þessu sinni.

Það er helst að frétta að kennslumatið hefur verið stytt allverulega, þannig að spurningum var fækkað úr 27 í 13. Þetta er gert í þeim tilgangi að auka svörun og vonandi verður sú raunin.
Það er auðvelt að nota snjallsíma við matið og við prófun voru nemendur ekki nema 4 – 6 mínútur að meta.

Spurningalistinn er að sjálfsögðu á íslensku en svo er hægt er að opna enska þýðingu.

Nordjobb – Vilt þú vinna erlendis í sumar?
Nordjobb hjálpar þér að finna sumarstarf og húsnæði í öðru norrænu landi. Alls konar störf eru í boði svo sem í garðyrkju, þjónustu, fiskvinnslu, á hótelum og á veitingastöðum.
Allir eru hvattir til að sækja um, einu skilyrðin fyrir þátttöku eru að vera á aldrinum 18-30 ára og að hafa viðunandi vald á dönsku, sænsku eða norsku.
Þetta er tilvalið tækifæri til að eyða sumrinu erlendis, öðlast starfsreynslu og auka færni sína í erlendu tungumáli.

Áhugasamir geta fyllt út umsókn til að gerast Nordjobbarar á eftirfarandi slóð:
https://semla.nordjobb.org/Registration.aspx?&lc=sv&cc=is

Hægt er að sjá laus störf hér:
https://www.nordjobb.org/is/saekja-um-vinnu.
ATH! Það kostar ekkert að taka þátt í Nordjobb verkefninu!

Nánari upplýsingar veitir Hannes, verkefnisstjóri Nordjobb á Íslandi, á island@nordjobb.org eða í síma 680-7477.

Tónlistarkeppni FÁ 2019 reyndist frábær skemmtun sem allir mega vera stoltir af. Leikar fóru svo að Bjartr alias Guðbjartur Daði fékk viðurkenningu fyrir frumlegasta atriðið, Ruth Rúnarsdóttir var í þriðja sæti, Alexandra Ýrr í öðru sæti og líka í fyrsta sæti ásamt Brynjari Erni Smárasyni en þau sungu hinn vinsæla dúett "Shallow" og voru vel að sigrinum komin en allir stóðu sig með prýði og það sannast enn og aftur að í FÁ er margt hæfileikafólk

Í kvöld klukkan átta verða slegnir strengir og barðar bumbur í sal skólans. Hin árlega tónlistarkeppni FÁ blæs í lúðrana. Þessi skemmtun er einn af hápunktum skólalífsins og því ætti enginn með viti að láta hana fram hjá sér fara. Hleypt er inn klukkan sjö í kvöld og það sem meira er, það er ókeypis inn! Og þar með hefur enginn afsökun fyrir að láta ekki sjá sig í kvöld og njóta þess að vera hluti af góðum hópi og listelskum félagskap. Vive la musique!

Dagarnir 4.-6. mars eru helgaðir forvarnaverkefninu „Sjúk Ást“ hér í FÁ og var formlega hleypt af stokkunum með fjölmiðlafundi í matsalnum í morgun. Verkefnið er á vegum Stígamóta og snýst um baráttu gegn og fræðslu um óheilbrigð samskipti, valdamisvægi og ofbeldi í ástarsamböndum unglinga. Innan þeirrar dagskrár býður femínistafélag skólans, Sigríður, upp á tvo fræðslufyrirlestra tengda málefninu:

**Þriðjudaginn 5. mars mætir Steinunn Gyðu- og Guðjónsdóttir, stýra forvarnaverkefnisins, og fræðir nemendur og starfsfólk um sjúka ást ungmenna og af hverju Stígamót ákvað að keyra þetta átak í gang.

**Miðvikudaginn 6. mars kemur kynfræðingurinn Sigga Dögg og fræðir okkur um samþykki, mörk og virðingu í kynlífi. 
Báðir fyrirlestrarnir verða í fyrirlestrasal skólans í hádeginu og byrja á slaginu 12:30

Það var líf og fjör í FÁ í dag þegar tíu litrík lið nemenda þreyttu göngu á milli þrauta sem lagðar voru fyrir liðin. Samt engin þrautaganga, frekar skemmtiganga. Þátttaka var góð og allir glaðir. Það var fjólubláa liðið sem fékk flest stig og þar með vegleg verðlaun. Eina umkvörtunarefni nemenda var að það var ekki boðið upp á neina vegan-pizzu. Úr því verður bætt að ári. Myndir frá Árdögum má finna á Facebook - síðu skólans. Og núna er tónlistarhátíðin framundan, en hún verður haldin þann 7. mars.