Nú er starfið að komast í fullan gang í skólanum eftir sumarleyfi og er skrifstofa skólans opin. Við erum bjartsýn um að skólastarf verði með eðlilegum hætti þetta skólaárið!

Hér eru helstu dagsetningar framundan sem gott er að hafa í huga fyrir nemendur og forráðamenn:

16.ágúst - stundatöflur verða aðgengilegar í INNU.

Töflubreytingar fara fram 16. og 17.ágúst og verða eingöngu rafrænar í gegnum netfangið toflubreytingar@fa.is.

17.ágúst kl. 13.00 - kynningarfundur fyrir nýnema (2006) í fyrirlestrarsal skólans.

17.ágúst kl. 14.00 - kynningarfundur fyrir nýja nemendur (fædda 2005 eða fyrr) í fyrirlestrarsal skólans.

18.ágúst - kennsla hefst samkvæmt stundarskrá.

19.ágúst - skráning hefst í fjarnám á haustönn 2022.

Foreldrar/forráðamenn nýnema verða boðaðir í viðtal með börnum sínum við umsjónarkennara frá 15.ágúst. Boðun í viðtalið fer fram nokkrum dögum áður með tölvupósti og/eða símtali.

Foreldrafundur verður haldinn 29.ágúst kl. 17.00.

Stefnt er á að halda nýnemadag 31.ágúst.

Allar upplýsingar um bókalista og námið má finna á heimasíðu skólans.

Í lokin viljum við minna á að í upphafi skólaárs er líka gott að gott að glöggva sig á öllum helstu dagsetningum á skólaárinu og skrá hjá sér. Einnig hvetjum við alla til að fylgjast með fréttum úr skólastarfinu á facebook og instagram.

Endilega hafið samband við skrifstofu skólans ef einhverjar spurningar vakna.

Við hlökkum til að sjá ykkur öll á nýju skólaári.

Nýstúdent og dúx Fjölbrautaskólans við Ármúla, Símon Tómasson, var þess heiðurs aðnjótandi, ásamt Lárusi Loga Elentínusarsyni frá Fjölbrautaskóla Suðurnesja, að taka þátt í hátíðarhöldum á Austurvelli í tilefni af 78 ára afmæli lýðveldisins.
Sú hefð hefur skapast að tveir nýstúdentar, frá sitthvorum skólanum, eru valdir ár hvert, á afmæli lýðveldisins, til þess að bera blómsveig frá íslensku þjóðinni að minnisvarða Jóns Sigurðssonar en forseti Íslands, Guðni Th. Jóhannesson, leggur svo blómsveiginn að minnisvarðanum.

Við erum stolt af framlagi nemanda FÁ í þessari hátíðlegu athöfn á þjóðhátíðardeginum 17. júní.

Þann 26.maí hélt fríður hópur kennara og starfsmanna í FÁ til Toronto í Kanada. Tilgangur ferðarinnar var að kynna sér starfið í tveim skólum þar í borg, George Brown College og Ryerson University. Flottir og stórir skólar sem gaman var að heimsækja. Einnig skoðuðum við ýmislegt sem Toronto hafði upp á að bjóða og heimsóttum m.a. Niagara fossana sem voru magnaðir. 

Hér má sjá nokkrar myndir úr ferðinni

Í dag var hátíðlegur dagur í FÁ þegar skólinn útskrifaði 94 nemendur og þar af 14 af tveimur brautum. 

Stúdentar af bóknámsbrautum eru 39. Frá nýsköpunar- og listabraut útskrifuðust 6 nemendur.

Af heilbrigðissviði útskrifuðust 36 nemendur; einn sem heilbrigðisritari, tveir sem lyfjatæknar, tveir sem læknaritarar, 8 sem heilsunuddarar, 15 sem sjúkraliðar og loks 9 sem tanntæknar.

Einnig útskrifuðust í dag 8 frábærir nemendur af sérnámsbraut.

Dúx skólans er Símon Tómasson sem útskrifaðist af náttúrufræðibraut með meðaleinkunnina 8,71.

Íris Björk Árnadóttir sem útskrifaðist af sjúkraliðabraut Heilbrigðisskóla FÁ hlaut viðurkenningu fyrir frábæran árangur í sérgreinum sjúkraliðabrautar með 9,7 í lokaeinkunn.

Magnús Ingvason skólameistari og Kristrún Birgisdóttir aðstoðarskólameistari fluttu ávörp og fóru yfir liðna önn.

Inga Birna Benediktsdóttir flutti kveðjuávarp fyrir hönd útskriftanema og Íris Björk Árnadóttir flutti kveðjuávarp fyrir hönd útskriftarnema Heilbrigðisskólans.

Elvar Jónsson, aðstoðarskólameistari FB flutti ávarp fyrir hönd 25 ára stúdenta.

Tveir farsælir starfsmenn skólans til margra ára voru kvaddir en það eru þær Steinunn H. Hafstað, fjarnámsstjóri og Ágústa Harðardóttir, dönskukennari.

Tónlistarflutningur við athöfnina var í höndum Önnu Zhu Ragnarsdóttur, nemanda við FÁ en hún flutti lagið Nocturne op.9 No. 2 eftir Chopin. 

Lauk síðan athöfninni með hátíðlegum samsöng allra viðstaddra á laginu Vikivaki við undirleik Önnu Zhu.

Við óskum útskriftarnemum til hamingju með áfangann og óskum þeim bjartrar framtíðar.

Fleiri myndir má sjá á facebook síðu skólans hér .

Útskrift Fjölbrautaskólans við Ármúla á vorönn 2022 mun fara fram í hátíðarsal skólans, miðvikudaginn 25.maí kl. 13.00.

Æfing fyrir útskrift verður þriðjudaginn 24.maí kl. 16.00

Senn líður að annarlokum og viljum við því minna ykkur á nokkur mikilvæg atriði.

17.maí - Síðasti kennsludagur en nánari upplýsingar um skipulag hvers áfanga má finna á Innu.

20.maí – Einkunnir birtast í Innu. Viðtöl vegna námsmats kl. 12:00 – 13:00.

23.maí– Upptökupróf fyrir útskriftarefni kl. 9:00.

24.maí - Æfing fyrir útskrift kl. 16:00

25.maí – Útskrift í hátíðarsal skólans kl. 13:00.

Nám á næstu önn - Allir nemendur sem halda áfram námi á næstu önn eiga að vera búnir að velja. Greiðsluseðlar verða sendir út eftir útskrift.

Gangi ykkur sem allra best á lokasprettinum.

Dagur B. Eggertsson borgarstjóri kíkti í heimsókn í skólann á miðvikudaginn síðasta. Markmið heimsóknarinnar var að kynna fyrir honum hugmyndir nemenda í áfanganum Hönnun lóðar FÁ.

Fjölbrautaskólinn við Ármúla stendur á stórri og fallegri lóð sem býður upp á mikla möguleika. Því var ákveðið að bjóða upp á valáfanga á vorönn þar sem nemendur myndu hanna tillögu að skipulagi lóðarinnar. Markmiðið er síðan að hagnýta útkomu áfangans við endurbætur á skólalóðinni.

Margar skemmtilegar hugmyndir komu fram og eru þær til sýnis á Steypunni í FÁ.

Fleiri myndir má sjá á Facebook síðu skólans.

Lið úr FÁ, Strokkur er komið í úrslit í Fyrirtækjasmiðju ungra frumkvöðla - JA Iceland. Það verður í hópi 35 fyrirtækja sem munu kynna vörur sínar fyrir dómarateymi næsta fimmtudag og flytja kynningu á vörum sínum í Arionbanka á föstudag. Alls voru 124 fyrirtæki skráð til leiks.

Strokkur er app veitir meiri fræðslu um íslensk fyrirtæki á Nasdaq og Firstnorth hlutabréfamarkaði. Nemendur í verkefninu eru Björn Ingi Björnsson, Finnur Björnsson, Birkir Hrafn Björnsson, Andri Snær Helgason og Tryggvi Klemens Tryggvason

Innilegar hamingjuóskir kæru frumkvöðlar og gangi ykkur vel í úrslitakeppninni.

 25.apríl til 8.maí mun nemendafélag FÁ (NFFÁ) halda áskorunardaga til styrktar Unicef – Börn í Yemen.

Ýmsar skemmtilegar áskoranir munu fara fram þegar tiltekinni upphæð hefur verið safnað. Þess má geta að NFFÁ mun tvöfalda þá upphæð og fer því hærri upphæð beint til Unicef.

Ýmsar áskoranir verða í gangi m.a. mun meðlimur NFFÁ fá sér tattoo, Magnús skólameistari klæðir sig upp í drag, námsráðgjafarnir verða með froskalappir og sundhettu heilan dag, Hilmar vaxar á sér fæturnar, Tinna kennari litar á sér hári ofl. ofl.

 Fylgjast má með framkvæmdinni á þessum áskorunum á instagram reikningi NFFÁ: https://instagram.com/nffa_draugarnir.

Til að styrkja málefnið má leggja inn á AUR: 699-4214.

Hvetjum nemendur, forráðamenn og aðra til að leggja þessu mikilvæga málefni lið.

Staða barna í Jemen er skelfileg en nú eftir sex ár af átökum og hörmungum er Jemen talinn einn versti staður á jörðinni til að vera barn. Vaxandi átök, hnignun í efnahagslífi landsins auk áhrifa kórónuveirunnar hefur gert hörmulegt ástand að einni verstu mannúðarkrísu í heiminum. Meira en 12 milljónir barna í Jemen þurfa á lífsnauðsynlegri hjálp að halda. Það er nánast hvert einasta barn í landinu !

https://www.unicef.is/neyd

Ungt umhverfisfréttafólk skólans og kennari þeirra, Jeannette Castioni fengu í gær viðurkenningu fyrir stórkostlega ljósmyndasýningu í Safnahúsinu, en það var Landvernd sem stóð að viðurkenningunni. 

Ljósmyndir nemendanna þótti endurspegla þeirra sýn og viðhorf á náttúruna og umhverfið. Ljósmyndirnar eru til sýnis í Safnahúsinu við Hverfisgötu. Landvernd vonast til að sýningin muni auka sýnileika á verkum ungs fólks, en þau eru mörg hver að gera frábæra hluti í umhverfismálum og verkin mjög áhrifarík.

Við hvetjum alla til þess að kíkja á þessa frábæru sýninguna á næstu dögum.