Prófasýning og frágangur á vali fyrir vorönn 2018 er á morgun 19. des. frá kl. 11:30 – 13:00. Jafnframt þarf að staðfesta val fyrir vorönn næsta árs. Það er um að gera að líta inn í skólann og skoða árangur sinn í prófunum og ganga um leið frá valinu fyrir vorönnina ef það er ekki þegar búið að gera. En stundum þarf að leiðrétta valið ef árangurinn var ekki eins og vonir stóðu til.  - Verið velkomin í skólann á morgun.

Nú eru prófin byrjuð, og standa fram í miðja næstu viku. Vonandi eru nemendur jafn svalir og rólegir eins og veðrið sem hefur dólað yfir landinu undanfarið; frostkaldir fagrir dagar. Vonandi gengur nemendum allt í haginn og námið gangi upp og áföngum náð. Við óskum þeim alls hins besta. Prófasýning verður svo að lokinni þessari prófalotu, eða 19. desember, frá klukkan 11:30 - 13:00. Þá er jafnframt unnt að ganga frá vali fyrir vorönn 2018. Á myndinni hér að neðan, má sjá skúlptúra eftir nemendur Sérdeildarinnar. Það eru þungt hugsandi höfuð sem endalaust geta bætt í þekkingarsarpinn. 

Vits er þörf þeim er víða ratar segir í Hávamálum. Það fór ekki  hátt um ferðalag þýskunemenda til Stralsund í Þýskalandi dagana 19-25. nóvember, á vegum Erasmus+ verkefnisins, "Huga, Gera og Starfa á sjálfbæran máta". Frá Íslandi fóru kennararnir Steinunn Geirsdóttir og Svanhildur Pálmadóttir og í fylgd með þeim fimm nemendur. Þetta var strembin ferð og ströng dagskrá eins og vera ber en hápunktur ferðarinnar var að hitta sjálfan Þýskalandskanslara Frau Merkel. Hún tók ferðalöngum vel og spurði margs um tíðarfar á Íslandi og hvort gott væri undir sauðfé á landinu. Þetta var frábær för en fundurinn með kanslaranum kannski það Merkel-legasta. Höfundarréttur á mynd: Bundesregierung/ Jesco Denzel. 

Á morgun 1. des,  á 99 ára afmæli fullveldis Íslands verður dimmission fagnað á sal. Fögnuðurinn hefst  kl. 10:40. Öll kennsla fellur því niður í tímanum sem er frá 10:40 til 11:40. Það er víst að það verður hopp og hí en óvíst hvort jólasveinninn sem  útdeildi mandarínum til þægu nemendanna í dag, mæti til að samfagna

Það er hægt að fara ýmsar leiðir í FÁ - þriggja ára nám til stúdentsprófs er í boði á fimm brautum:

Félagsfræðabraut, hugvísindabraut, náttúrufræðibraut,
 viðskipta- og hagfræðibraut og íþrótta- og heilbrigðisbraut.
 Þá er líka í boði nám á nýsköpunar- og listabraut auk fjarnáms.
 Auk þess býður Heilbrigðisskólinn upp á starfsnám með möguleika á stúdentsprófi.

Opið er fyrir innritun í námið til 1. desember.

Skóli er miklu meira en bara hús. Skóli er samfélag manna sem eru ákveðnir í því að vita meira í dag en í gær. Skóli er alls staðar þar sem nemendur eru að læra og um daginn var skólinn í húsi Seðlabanka Íslands við Arnarhól þar sem nokkrir nemendur í HAGF2AÞ05 Þjóðhagfræði við FÁ fóru og kynntu sér peningamál íslenska lýðveldisins. Má segja að þar hafi þeir velt við hverri krónu og horft í aurinn.

Helgi Gíslason myndhöggvar sem lengi kenndi við myndlistabraut FB heldur fyrirlestur í FÁ í dag, föstudaginn 17.nóvember klukkan 11.00. Helgi hefur haft að viðfangsefni að greina mannslíkamann á grunni módelteikningar og byggir það jafnframt á þekkingu sinni sem myndhöggvari. Helgi mun fjalla um það hvernig módelteikning og teikning mannslíkamans er grunnur í listum, hönnun og arktitektúr þar sem rannsóknarferli er fylgt í gegnum teikningu. 

Í dag er haldið upp á Dag íslenskrar tungu. En þennan dag, 16. nóvember 1807 fæddist listaskáldið góða að Hrauni í Öxnadal. Þótt allir dagar séu að sjálfsögðu dagar íslenskrar tungu þykir við hæfi að tileinka móðurmálinu þennan dag til þess að fagna fjölbreytileika og fegurð íslenskunnar.Það á að vera kappsmál hvers manns að leika sem fegurst á þá hljómfögru hörpu sem móðurmálið okkar er, ekki spilla hljómum með óþarfa slettum eða fölskum tónum orðskrípa. 

Íslands minni (samið 1839)

Þið þekkið fold með blíðri brá
og bláum tindi fjalla
og svanahljómi, silungsá
og sælu blómi valla
og bröttum fossi, björtum sjá
og breiðum jökulskalla –
drjúpi’ hana blessun drottins á
um daga heimsins alla.

Ennþá eiga einhverjir eftir að velja fyrir vorönn og velkjast í vafa. En þá kemur Sumarliði til bjargar! Hann ætlar semsagt að setja upp leiksýningu í vor og það vantar áhugasamt hæfileikafólk svo að draumur Sumarliða verði að veruleika. Það er leitað að hljóðfæraleikunum, söngvurum, sviðsfólki og þúsundþjalasmiðum í leikmyndasmíði. Þá vantar tæknifólk, saumafólk sem kann að búa til leikbúninga og alls konar annað hæfileikafólk, til dæmis í sjoppu og auglýsingar. Og rúsínan í pylsuendanum er að öll þessi skemmtun við að setja upp sýningu gefur EININGAR! Valið auðvelt. Skrá sig núna.

Nú stendur til boða að taka stöðupróf í dönsku, ensku, frönsku, spænsku og þýsku. Prófin eru ætluð fyrir þá sem telja sig hafa það mikið vald á málunum að þeir geti skeiðað yfir fyrstu áfangana og byrjað í efri áföngum. Þeir sem hafa áhuga á að þreyta stöðupróf skyldu hafa samband við viðeigandi tungumálakennara til þess að fá gleggri upplýsingar. Skráning er á skrifstofu til og með 10. nóvember