Í gær var opið hús í FÁ fyrir 10.bekkinga og aðra áhugasama. Það var mjög góð mæting og frábær stemning. Við þökkum öllum fyrir komuna og vonumst til að sjá sem flesta á næstu önn.
Til að kynna sér skólann enn frekar þá eru upplýsingar hér.
Opið hús verður í Fjölbrautaskólanum við Ármúla fimmtudaginn 23.mars kl. 16.30 - 18.00.
Kynning verður á námsbrautum, aðstöðu og félagslífi skólans.
Við hvetjum nemendur í 9. og 10. bekk og forráðamenn þeirra til að koma og kynna sér það fjölbreytta nám sem er í boði.
Búið er að stofna viðburð á facebook og hvetjum við fólk til að skrá sig þar til að fylgjast með upplýsingum um opna húsið.
Í upphafi vikunnar fóru nemendur í Íslands-og mannkynssögu frá lokum 18. aldar til samtímans í vettvangsferð á Alþingi, sem er eitt elsta samfellda þjóðþing heims.
Vilhjálmur Árnason, alþingismaður og formaður samgöngunefndar Alþingis, tók á móti hópnum, sýndi þeim húsið og fór yfir sögu og störf þingsins. Meðal þess sem vakti athygli og áhuga nemenda var þjóðfundarmálverk Gunnlaugs Blöndals, listmálara frá Blönduósi, frá þjóðfundinum 1851.
Þá sagði Vilhjálmur einnig nemendum frá fyrri störfum sínum sem lögreglumaður en þá kom í ljós að meðal nemanda í hópnum var einn þeirra sem ætlaði sér að leggja stund á nám í lögreglufræðum og verða lögreglumaður. Vilhjálmur hafði þá á orði að það væri ágætis grunnur til að verða þingmaður enda hefði reynsla hans úr lögreglunni nýst honum vel í þingstörfunum sem og öðru sem hann hefði tekið sér fyrir hendur.
Nemendum þótti heimsóknin gagnleg en ekki síður fróðleg, enda tengdist hún ýmsu því sem þau læra um í áfanganum.
Nemendur í félagsfræði og viðskiptalögfræði skólans fóru í heimsókn í Fangelsismálastofnun sem sér um fullnustu refsinga og önnur verkefni í samræmi við ákvæði laga um fullnustu refsingar. Erla Kristín Ásgeirsdóttir lögfræðingur og staðgengill forstjóra hélt fyrirlestur um hlutverk, starfsemi og málefnalega hugmyndafræði stofnunarinnar.
Áherslur Fangelsismálastofnunar snúast umfram allt um betrun eins og hjá systurstofnunum hennar á Norðurlöndum. Þessi betrun skilar brotamönnum í ríkari mæli aftur út í samfélagið sem friðsömum og gagnlegum borgurum.
Aðspurðir um ferðina nefndu nemendur að vettvangsferðin hefði opnað augu þeirra gagnvart mikilvægi betrunar og samkenndar í málaflokki brotamanna og töldu mikilvægt að falla ekki í gryfju múgæsings og refsigirni.
Við fengum góða gesti í heimsókn í skólann í síðustu viku. Konur úr Alfadeild Delta Kappa Gamma, sem er alþjóðlegt félag kvenna í fræðslustörfum, komu til að kynna sér skólastarfið og einkum og sér í lagi Heilbrigðisskólann. Skólastjórnendur, formaður skólanefndar og deildarstjórar Heilbrigðiskólans tóku vel á móti hópnum. Þær Aðalheiður D. Matthiesen og Kristrún Sigurðardóttir kennslustjórar heilbrigðisgreina kynntu það nám sem til boða stendur, hvaða réttindi það veitir nemendum og mikilvægi þess fyrir heilbrigðiskerfið.
Síðan skoðuðu gestirnir kennsluaðstöðuna í Heilbrigðisskólanum og höfðu á orði að hún væri til algjörrar fyrirmyndar og nauðsynlegt væri að hvetja fleiri til að mennta sig á þessu sviði.
Síðastliðin fimmtudag hélt FÁ sinn árlega Árdag. Árdagur er þemadagur þar sem skóladagurinn er brotinn upp og í stað hefðbundinnar kennslu skemmta nemendur og starfsfólk sér saman.
Nemendur skiptu sér í 18 lið, hvert lið merkt ákveðnum lit eða mynstri. Liðin kepptu síðan sín á milli í fjölbreyttum þrautum sem starfsfólk var búið að undirbúa. Meðal annars var keppt í karókí, boccia, golfi, spurningakeppnum, heilaleikfimi, leiklist og ýmsu öðru.
Eftir þrautirnar var nemendum boðið upp á pizzur og gos og síðan fór tónlistar- og söngkeppni FÁ fram í matsal skólans.
Það var Gula liðið sem vann keppnina eftir harða baráttu við Dökkgræna liðið. Hlutu þau farandsbikar og bíómiða í verðlaun.
Þátttaka var góð og mikil stemning myndaðist hjá nemendum sem loksins fengu að taka þátt í Árdegi eftir þriggja ára pásu.
Fleiri myndir má sjá á Facebook síðu skólans .
Á fimmtudaginn síðasta, 2. mars fór tónlistar- og söngkeppni FÁ fram, á Árdegi skólans. Jón Jónsson var kynnir í keppninni og tók nokkur lög. Níu stórkostleg atriði tóku þátt og það má sanni segja að það sé mikið af hæfileikaríku tónlistarfólki í skólanum okkar. Í sex atriðum af níu þá sungu og spiluðu undir nemendur úr tónlistaráfanga skólans. Öll atriðin voru frábær en úrslitin urðu þau að Askur Ari Davíðsson lenti í þriðja sæti með lagið No surprises með Radiohead. Sigrún Ásta Gunnarsdóttir var í öðru sæti með lagið The Climb með Miley Cyrus. Í fyrsta sæti varð svo hann Þorbjörn Helgason með lagið Touch me með The Doors, en Þorbjörn var einmitt í öðru sæti í keppninni í fyrra. Þorbjörn mun því taka þátt í Söngkeppni framhaldsskólanna sem fer fram 1. apríl í Kaplakrika.
Nemendur í kvikmyndaáfanga skólans tóku upp keppnina og tóku viðtöl við keppendur. Keppnina má sjá hér .
Einstök atriði má svo sjá hér.
Fleiri myndir frá keppninni má sjá á Facebook síðu skólans.
Nemendur á viðskipta-og hagfræðibraut í bókfærslu fóru í vettvangsheimsókn til Ríkisskattsjóra og fengu fyrirlestur í tengslum við það sem þau eru að læra í áfanganum. Farið var yfir meðal annars það helsta varðandi virðisaukaskatt og skil á virðisaukaskattskýrslu.
Þar sem komið er að skattauppgjöri einstaklinga sem skila á inn frá 1.til 14. mars næstkomandi fengu nemendur kynningu á því helsta varðandi skil á skattskýrslum. Nemendum þótti heimsóknin fróðleg og áhugaverð og höfðu á orði að margt hefði komið fram sem ætti án efa eftir að gagnast þeim í náminu.
Föstudaginn 3.mars er starfsþróunardagur kennara í Fjölbrautaskólanum við Ármúla. Öll kennsla fellur niður þennan dag og skrifstofa skólans verður jafnframt lokuð.
Á fimmtudaginn, 2.mars verður Árdagur haldinn í FÁ. Árdagur er árlegur þemadagur þar sem skóladagurinn er brotinn upp og í stað hefðbundinnar kennslu skemmta nemendur og starfsfólk sér saman.
Nemendur skrá sig í hópa og leysa þrautir sem starfsfólk eru búið að undirbúa. Í hádeginu er svo tónlistar- og söngkeppni FÁ og síðan verður pizzuveisla í boði fyrir nemendur.