Þann 26.maí hélt fríður hópur kennara og starfsmanna í FÁ til Toronto í Kanada. Tilgangur ferðarinnar var að kynna sér starfið í tveim skólum þar í borg, George Brown College og Ryerson University. Flottir og stórir skólar sem gaman var að heimsækja. Einnig skoðuðum við ýmislegt sem Toronto hafði upp á að bjóða og heimsóttum m.a. Niagara fossana sem voru magnaðir.
Hér má sjá nokkrar myndir úr ferðinni
Í dag var hátíðlegur dagur í FÁ þegar skólinn útskrifaði 94 nemendur og þar af 14 af tveimur brautum.
Stúdentar af bóknámsbrautum eru 39. Frá nýsköpunar- og listabraut útskrifuðust 6 nemendur.
Af heilbrigðissviði útskrifuðust 36 nemendur; einn sem heilbrigðisritari, tveir sem lyfjatæknar, tveir sem læknaritarar, 8 sem heilsunuddarar, 15 sem sjúkraliðar og loks 9 sem tanntæknar.
Einnig útskrifuðust í dag 8 frábærir nemendur af sérnámsbraut.
Dúx skólans er Símon Tómasson sem útskrifaðist af náttúrufræðibraut með meðaleinkunnina 8,71.
Íris Björk Árnadóttir sem útskrifaðist af sjúkraliðabraut Heilbrigðisskóla FÁ hlaut viðurkenningu fyrir frábæran árangur í sérgreinum sjúkraliðabrautar með 9,7 í lokaeinkunn.
Magnús Ingvason skólameistari og Kristrún Birgisdóttir aðstoðarskólameistari fluttu ávörp og fóru yfir liðna önn.
Inga Birna Benediktsdóttir flutti kveðjuávarp fyrir hönd útskriftanema og Íris Björk Árnadóttir flutti kveðjuávarp fyrir hönd útskriftarnema Heilbrigðisskólans.
Elvar Jónsson, aðstoðarskólameistari FB flutti ávarp fyrir hönd 25 ára stúdenta.
Tveir farsælir starfsmenn skólans til margra ára voru kvaddir en það eru þær Steinunn H. Hafstað, fjarnámsstjóri og Ágústa Harðardóttir, dönskukennari.
Tónlistarflutningur við athöfnina var í höndum Önnu Zhu Ragnarsdóttur, nemanda við FÁ en hún flutti lagið Nocturne op.9 No. 2 eftir Chopin.
Lauk síðan athöfninni með hátíðlegum samsöng allra viðstaddra á laginu Vikivaki við undirleik Önnu Zhu.
Við óskum útskriftarnemum til hamingju með áfangann og óskum þeim bjartrar framtíðar.
Fleiri myndir má sjá á facebook síðu skólans hér .
Útskrift Fjölbrautaskólans við Ármúla á vorönn 2022 mun fara fram í hátíðarsal skólans, miðvikudaginn 25.maí kl. 13.00.
Æfing fyrir útskrift verður þriðjudaginn 24.maí kl. 16.00
Senn líður að annarlokum og viljum við því minna ykkur á nokkur mikilvæg atriði.
17.maí - Síðasti kennsludagur en nánari upplýsingar um skipulag hvers áfanga má finna á Innu.
20.maí – Einkunnir birtast í Innu. Viðtöl vegna námsmats kl. 12:00 – 13:00.
23.maí– Upptökupróf fyrir útskriftarefni kl. 9:00.
24.maí - Æfing fyrir útskrift kl. 16:00
25.maí – Útskrift í hátíðarsal skólans kl. 13:00.
Nám á næstu önn - Allir nemendur sem halda áfram námi á næstu önn eiga að vera búnir að velja. Greiðsluseðlar verða sendir út eftir útskrift.
Gangi ykkur sem allra best á lokasprettinum.
Dagur B. Eggertsson borgarstjóri kíkti í heimsókn í skólann á miðvikudaginn síðasta. Markmið heimsóknarinnar var að kynna fyrir honum hugmyndir nemenda í áfanganum Hönnun lóðar FÁ.
Fjölbrautaskólinn við Ármúla stendur á stórri og fallegri lóð sem býður upp á mikla möguleika. Því var ákveðið að bjóða upp á valáfanga á vorönn þar sem nemendur myndu hanna tillögu að skipulagi lóðarinnar. Markmiðið er síðan að hagnýta útkomu áfangans við endurbætur á skólalóðinni.
Margar skemmtilegar hugmyndir komu fram og eru þær til sýnis á Steypunni í FÁ.
Fleiri myndir má sjá á Facebook síðu skólans.
Lið úr FÁ, Strokkur er komið í úrslit í Fyrirtækjasmiðju ungra frumkvöðla - JA Iceland. Það verður í hópi 35 fyrirtækja sem munu kynna vörur sínar fyrir dómarateymi næsta fimmtudag og flytja kynningu á vörum sínum í Arionbanka á föstudag. Alls voru 124 fyrirtæki skráð til leiks.
Strokkur er app veitir meiri fræðslu um íslensk fyrirtæki á Nasdaq og Firstnorth hlutabréfamarkaði. Nemendur í verkefninu eru Björn Ingi Björnsson, Finnur Björnsson, Birkir Hrafn Björnsson, Andri Snær Helgason og Tryggvi Klemens Tryggvason
Innilegar hamingjuóskir kæru frumkvöðlar og gangi ykkur vel í úrslitakeppninni.
25.apríl til 8.maí mun nemendafélag FÁ (NFFÁ) halda áskorunardaga til styrktar Unicef – Börn í Yemen.
Ýmsar skemmtilegar áskoranir munu fara fram þegar tiltekinni upphæð hefur verið safnað. Þess má geta að NFFÁ mun tvöfalda þá upphæð og fer því hærri upphæð beint til Unicef.
Ýmsar áskoranir verða í gangi m.a. mun meðlimur NFFÁ fá sér tattoo, Magnús skólameistari klæðir sig upp í drag, námsráðgjafarnir verða með froskalappir og sundhettu heilan dag, Hilmar vaxar á sér fæturnar, Tinna kennari litar á sér hári ofl. ofl.
Fylgjast má með framkvæmdinni á þessum áskorunum á instagram reikningi NFFÁ: https://instagram.com/nffa_draugarnir.
Til að styrkja málefnið má leggja inn á AUR: 699-4214.
Hvetjum nemendur, forráðamenn og aðra til að leggja þessu mikilvæga málefni lið.
Staða barna í Jemen er skelfileg en nú eftir sex ár af átökum og hörmungum er Jemen talinn einn versti staður á jörðinni til að vera barn. Vaxandi átök, hnignun í efnahagslífi landsins auk áhrifa kórónuveirunnar hefur gert hörmulegt ástand að einni verstu mannúðarkrísu í heiminum. Meira en 12 milljónir barna í Jemen þurfa á lífsnauðsynlegri hjálp að halda. Það er nánast hvert einasta barn í landinu !
Ungt umhverfisfréttafólk skólans og kennari þeirra, Jeannette Castioni fengu í gær viðurkenningu fyrir stórkostlega ljósmyndasýningu í Safnahúsinu, en það var Landvernd sem stóð að viðurkenningunni.
Ljósmyndir nemendanna þótti endurspegla þeirra sýn og viðhorf á náttúruna og umhverfið. Ljósmyndirnar eru til sýnis í Safnahúsinu við Hverfisgötu. Landvernd vonast til að sýningin muni auka sýnileika á verkum ungs fólks, en þau eru mörg hver að gera frábæra hluti í umhverfismálum og verkin mjög áhrifarík.
Við hvetjum alla til þess að kíkja á þessa frábæru sýninguna á næstu dögum.
Í dag fór fram vorgleði umhverfisnefndar FÁ. Guðlaugur Þór Þórðarson umhverfis-, orku-, og loftslagsráðherra, kom í heimsókn og spjallaði við nemendur í fyrirlestrarsal um ýmis mál er viðkoma umhverfis og orkumálum og voru nemendur FÁ duglegir að spyrja spurninga. Eftir spjallið kíkti ráðherra út og plokkaði í kringum skólalóðina ásamt nokkrum nemendum og kennurum. Í tilefni dagsins bauð umhverfisnefndin og nemendaráðið svo nemendum upp á veitingar frá Mandý, Serrano og Kore.
Við þökkum Guðlaugi Þór kærlega fyrir komuna.
Fleiri myndir má sjá á facebook síðu skólans, hér.
FÁ á Vörumessu
Núna um helgina fór fram Vörumessa í Smáralindinni. Vörumessa er fyrirtækjasmiðja Ungra frumkvöðla en þetta árið kynntu 600 framhaldsskólanemendur frá 14 skólum vörur sínar og þjónustu í Smáralindinni. Þau hafa stofnað 124 fyrirtæki frá því í janúar. Nemendur úr FÁ voru með þrjú fyrirtæki á Vörumessunni.
Búbblur hyggst hanna og láta framleiða drykk sem er ætlaður til blöndunar fyrir áfenga drykki. Einar Skuggi Jónsson, Gylfi Snær Ingimundarson, Jóakim Hjálmarsson, Unnsteinn Beck og Matthías Valdimarsson
Ljómar er kerti til styrktar flóttamönnum frá Úkraínu. Gabríel Karl Halldórsson, Camilla Sóldís Harðardóttir, Heiðrún Líf Reynisdóttir, Íris Elísabet Ólafsdóttir, Mikael Máni Magnússon og Þorbjörn Helgason
Strokkur er app veitir meiri fræðslu um Íslensk fyrirtæki á Nasdaq og Firstnorth hlutabréfamarkaði. Björn Ingi Björnsson, Finnur Björnsson, Birkir Hrafn Björnsson, Andri Snær Helgason og Tryggvi Klemens Tryggvason.