Ágætu nemendur og forráðamenn,

Ekki er útlit fyrir að Covid-19 veirunni verði komið fyrir kattarnef alveg á næstunni, því miður. Enn eru smit að greinast, en þeim fer þó fækkandi. Nýjar sóttvarnareglur voru kynntar í dag og gilda þær til 2. desember. Samkvæmt þeim er heimilt að allt að 25 nemendur á framhaldsskólastigi megi vera í sama rými, en þeir mega ekki fara á milli kennslustofa. Í áfangaskóla eins og FÁ fara nemendur á milli stofa eftir hverja kennslustund, þannig að skólayfirvöld sjá ekki möguleika á að staðkennsla hefjist að nýju.

Það verður því fjarkennsla út önnina í dagskólanum. Einstaka hópar nemenda hafa fengið að koma inn í skólann undanfarnar vikur í sérstökum tilfellum og verður svo áfram. Þá munu allir nemendur á sérnámsbraut mæta í skólann frá og með miðvikudeginum 18. nóvember.Öll próf í lok annar, önnur en verkleg próf, verða rafræn.
Á næstunni verður skoðað hvernig útskrift frá skólanum verður háttað.

Svo vona ég að nemendur standi sig vel í náminu þessar örfáu vikur sem eftir eru. Lykillinn að góðum árangri er að skila öllum verkefnum sem á að skila, þar sem hvert verkefni telur í lokin.

Góða helgi
Magnús Ingvason,

Skólameistari FÁ

Fyrr í haust var blásið til hönnunarsamkeppni meðal nemenda FÁ um logo á nýjar skólapeysur. Fjölmargar og fjölbreyttar hugmyndir bárust og eftir æsispennandi kosningu á Instagram bar Sara Lind Styrmisdóttir sigur úr býtum.

Nú er hægt að panta sér þessa glænýju skólapeysu á frábæru verði, og bæði verður hægt að sækja peysur niður í skóla og fá heimsent (innan höfuðborgarsvæðis). Peysurnar koma í þremur litum, mörgum stærðum og bjóðast bæði sem hettupeysur og háskólapeysur.

Pantið peysur HÉR !

Ágætu nemendur og forráðamenn

Eins og flestum er eflaust kunnugt hafa hertar sóttvarnarreglur tekið gildi í samfélaginu.

Það liggur því fyrir að fjarkennsla verður í dagskóla næstu vikur, en við vonumst auðvitað eftir því að smitum fari að fækka og í framhaldinu verði slakað nægilega mikið á samkomuhöftum til að við getum opnað skólann aftur fyrir nemendum.

Á meðan við bíðum átekta biðjum við okkar nemendur að halda áfram að sinna náminu eins vel og þeir hafa verið að gera.

Flestir nemendur eru að mæta vel í Teams-tímana sem skiptir höfuðmáli til að ná góðum árangri í náminu. Nú styttist óðum í annarlok og því mikilvægt að skipuleggja sig vel, fylgjast með kennsluáætlun og passa upp á að verkefnum og öðru sé skilað á réttum tíma.

Ég vil minna nemendur á stoðþjónustu skólans og hvet þá sem eiga í einhverjum erfiðleikum með námið að hafa samband við náms- og starfsráðgjafa skólans. Netföng þeirra eru á heimasíðu skólans.

Kveðja,

Magnús Ingvason

Skólameistari FÁ 

Ágætu nemendur og forráðamenn,

Nú er 5. vika fjarnáms senn á enda og framundan er vetrarfrí hjá nemendum. Föstudaginn 23. og mánudaginn 26. október er engin kennsla í skólanum. Ég hvet nemendur til þess að njóta frísins vel, hlaða batteríin (eins og stundum er sagt) og ekki sakar að huga eitthvað að verkefnum. Vinna upp ef eitthvað hefur setið á hakanum að undanförnu.

Sóttvarnayfirvöld hafa boðað hertar sóttvarnareglur og á meðan þær reglur eru í gildi verður fjarkennsla við skólann. Um leið og slakað verður á reglum um skólahald, verður okkar fyrsti kostur að hefja öflugt staðnám að nýju.

Það er ljóst að nemendum gengur misjafnlega að fóta sig í því breytta námsfyrirkomulagi sem fjarnámið felur í sér. Ég hvet nemendur sem eiga í einhverjum erfiðleikum á þessum tímum að nýta sér þá frábæru stoðþjónustu sem er að finna í skólanum. Netföng og símanúmer er að finna á heimasíðu skólans www.fa.is.

Okkur er mjög umhugað um að allir nemendur okkar nái sem bestum árangri á þessari skrýtnu önn. Þar sem um símat er að ræða í flestum áföngum er svo mikilvægt að reyna að skila öllum verkefnum, þar sem hvert verkefni telur í lokin.

Enn og aftur biðjum við nemendur og forráðamenn um að fylgjast vel með fréttum á heimasíðu og Fésbókarsíðu skólans en þar verða settar inn upplýsingar um leið og eitthvað skýrist.

Með góðri kveðju,

Magnús Ingvason

Skólameistari FÁ

Ágætu nemendur og forráðamenn,

Nú liggur fyrir að kennsla mun fara fram í fjarnámi á Teams samkvæmt stundatöflu í það minnsta til 19. október. Það er ljóst að fjarnám hentar nemendum misjafnlega en vegna fjölda smita í samfélaginu og hertra reglna heilbrigðisyfirvalda er fjarnámið eini kosturinn sem við höfum til að halda uppi kennslu í skólanum.

Fjarnám krefst þess að nemendur skipuleggi nám sitt enn betur en áður, og umfram allt er lykilatriði að mæta í alla Teams-tímana. Þar sem áfangarnir eru flestir símatsáfangar er mikilvægt að halda sig við efnið og skila verkefnum á tilsettum tíma.

Partur af því að skipuleggja nám sitt vel er að halda rútínu og passa vel upp á svefn, hreyfingu og mataræði.

Þó við höfum áhyggjur af velferð og námsframvindu allra okkar nemenda, höfum við hvað mestar áhyggjur af nemendum sem eru yngri en 18 ára. Við biðjum þau sem standa að þeim hópi að taka þátt í því að hvetja nemendur áfram, fylgjast vel með mætingu og námsframvindu á INNU og Moodle.

Þessa dagana eru umsjónakennarar nemenda yngri en 18 ára að hafa samband við sína nemendur til að taka stöðuna á því hvernig gengur.

Við minnum einnig á að í skólanum er öflugt stuðningsteymi sem er að störfum þótt nemendur séu ekki í skólanum. Nemendur sem þurfa aðstoð vegna skipulagningu náms eiga að hafa samband við náms- og starfsráðgjafa en hægt er að óska eftir viðtali með því að hringja eða senda póst á namsradgjof@fa.is.

Við skólann starfar einnig sálfræðingur og við hvetjum nemendur sem telja sig þurfa á sálfræðiaðstoð að halda að senda póst á salfraedingur@fa.is.

Kær kveðja,

Magnús Ingvason, skólameistari FÁ

PS. Einn af námsráðgjöfum skólans var í viðtali á RÚV í vor þar sem hún gaf nemendum góð ráð þegar fyrsta bylgja veirunnar reið yfir og er jafn gagnlegt núna: https://www.ruv.is/frett/2020/04/16/jafnvaegi-milli-thess-sem-madur-vill-og-tharf-ad-gera

PSS. Lagið sem starfsmenn skólans „sendu“ nemendum í vor á einnig enn við á þessum tímum: https://www.youtube.com/watch?v=mcCgrkiIeww 

Ágætu nemendur og forráðamenn,

Í ljósi þess að smitum hefur fjölgað mikið í samfélaginu höfum við tekið þá ákvörðun að öll kennsla, fyrir utan kennslu nemenda á sérnámsbraut, verði áfram í fjarnámi í næstu viku.

Nemendur, aðrir en þeir sem eru á sérnámsbraut, eiga því ekki að mæta í skólann á mánudaginn eins og ráðgert var. Kennt verður samkvæmt stundaskrá á Teams og við hvetjum nemendur til að mæta vel í Teams tímana og stunda námið áfram af kappi.

Um leið og eitthvað breytist munum við setja inn fréttir á heimasíðu skólans og samfélagsmiðla. Nemendur sem ekki hafa aðgang að tölvum er bent á að senda póst á skrifstofa@fa.is.

Með góðri kveðju,
Magnús Ingvason, skólameistari
og Kristrún Birgisdóttir, aðstoðarskólameistari

Ágætu nemendur og forráðamenn.

Viðvarandi Covid-19 ástandi ætlar ekki að linna í bráð. Þrátt fyrir talsvert mörg smit í samfélaginu er ætlun okkar skólayfirvalda að byrja að hleypa inn nemendum í smáum stíl þessa viku.

Mjög ströng grímuskylda verður í öllum skólanum; í kennslustofum, á göngum skólans og í öllum öðrum rýmum. Nemendur eru hvattir til þess að koma með sínar eigin grímur, en einnig verður hægt að fá grímur á skrifstofu skólans. Allir nemar sótthreinsa borð sín í upphafi kennslutíma, og við virðum 1 metra regluna og 2 metra regluna þar sem hægt er. Nemendur eru einnig hvattir til þess að koma með nesti með sér þar sem matsala verður lokuð þessa viku.

Mæting nemenda í vikunni er eftirfarandi:
*Mánudagur 28. september og út vikuna – Nemendur á sérnámsbraut.
*Þriðjudagur 29. september og út vikuna – Nemendur í verklegum áföngum í Heilbrigðisskólanum og nemendur á sjúkraliðabrú.
*Miðvikudagur 30. september og út vikuna – Nemendur sem eru í ÍSAN og ÍSTA áföngum.
*Fimmtudagur 1. október og út vikuna – Nemendur sem eru í UN, GR og BY áföngum í dönsku, ensku, íslensku og stærðfræði og LÍFS1ÉG03 og UMSJ1ÉG01 áföngum.

Kennsla í öllum öðrum áföngum verður í Teams þessa viku eins og verið hefur.
Ráðgert er svo að allir nemendur skólans komi nk. mánudag 5. október í skólann í staðkennslu.

Allt ofanritað er að sjálfsögðu með ýmsum fyrirvörum. Ef eitthvað óvænt kemur upp, verður brugðist við því og nemendur og forráðamenn látnir vita af því eins fljótt og auðið er.

Kveðja.
Magnús Ingvason
Skólameistari FÁ

Ágætu nemendur og forráðamenn.

Eins og ykkur er kunnugt hefur fjarkennsla verið við lýði þessa viku. Samkvæmt upplýsingum sem ég fæ hjá kennurum hefur hún alla jafna tekist vel; nemendur áhugasamir og virkir. Staðkennsla er þó það sem við stefnum að, en vegna óvissuástands vegna Covid-19 ætlum við að fara varlega í að fá nemendur inn í skólann.

Þó eru ákveðnir hópar nemenda sem við viljum fá inn í skólann sem fyrst. Nk. mánudag munu t.d. nemendur á sérnámsbraut koma í skólann samkvæmt stundaskrá, en þeir eru í sér rými í skólanum. Aðrir nemendur stunda áfram fjarnám samkvæmt stundatöflu.

Kennsla í skólanum í næstu viku lýtur afar ströngum skilyrðum. Allir nemendur og kennarar bera grímu; bæði í kennslustofum og almennum rýmum. Auk þess verður 1 metra reglan viðhöfð í öllum skólanum. Þá höldum við áfram að sótthreinsa skólaborð í upphafi hvers kennslutíma. Enginn afsláttur verður gefinn vegna þessara ráðstafana og ég treysti því að farið verði eftir þeim í einu og öllu.

Eftir sem áður á enginn að koma í skólann sem finnur fyrir minnstu einkennum Covid-19.

Ákvörðun um nánara fyrirkomulag verður kynnt í síðasta lagi á hádegi nk. mánudag og verður tilkynning um slíkt sett á heimasíðu skólans.

Kveðja.

Magnús Ingvason

Skólameistari FÁ

Allt starfsfólk Fjölbrautaskólans við Ármúla er komið í sóttkví, en þrír nemendur og tveir starfsmenn hafa greinst með kórónuveiruna.

Nemendur skólans þurfa ekki að fara í sóttkví nema þeir finni fyrir einkennum veirunnar (kvefi, hósta, hita, höfuðverk, bein- eða vöðvaverkjum, þreytu o.fl.), en frekari upplýsingar um slíkt má finna á covid.is og heilsuvera.is. Þetta er samkvæmt ráðleggingum sóttvarnayfirvalda, en skólinn hefur átt gott samstarf við þau vegna málsins.

Þessa viku er fjarkennt í gegnum forritið Teams og því hefur sóttkví starfsmanna ekki mikil áhrif á skólastarfið, nema á sérnámsbraut skólans sem átti að vera í kennslu þessa viku. Í lok þessarar viku verður tekin ákvörðun um fyrirkomulag skólastarfsins næstu vikur.

Gangi ykkur öllum vel í náminu þessa viku.

Kveðja.

Magnús Ingvason

Skólameistari FÁ

Ágætu nemendur og forráðamenn,

Komið hefur í ljós að tveir nemendur við skólann hafa greinst með Covid–19. Umræddir nemendur tengjast vinaböndum og hafa lítið verið í nánum samskiptum við aðra nemendur skólans. Skólameistarar hafa um helgina unnið í nánu samstarfi við sóttvarnaryfirvöld, þ.m.t. smitrakningarteymi almannavarna, og unnið er samkvæmt þeirra leiðbeiningum að úrvinnslu málsins. Vegna þeirra sóttvarna sem viðhafðar hafa verið í skólanum er talið nær ómögulegt að samnemendur eða kennarar viðkomandi nemenda hafi smitast en við hvetjum alla nemendur sem finna til minnstu einkenna að hafa samband við www.heilsuvera.is til að bóka skimun.

Líkt og áður hefur komið fram í pósti fer kennsla fram í fjarnámi í Teams samkvæmt stundatöflu í næstu viku. Við minnum á að allir þurfa að mæta í þessar Teams kennslustundir, svo og fylgjast vel með skilaboðum sem kunna að koma frá kennurum í einstaka áföngum. Sjá Teams leiðbeiningar HÉR.

Þar sem skólanum verður lokað fyrir nemendum í níu daga (helgar meðtaldar) eru góðar líkur á því að við náum að koma í veg fyrir frekari útbreiðslu á þessu einstaka smiti og þar með getum við hafið eðlilegt skólastarf að nýju sem allra, allra fyrst. Við hvetjum nemendur til að stunda námið af kappi og fylgjast vel með fréttum frá skólanum næstu daga.

Með góðri kveðju,

Magnús Ingvason, skólameistari

Kristrún Birgisdóttir, aðstoðarskólameistari